I 16 mindre bygder i fylket har Sparebanken Sogn og Fjordane hatt filialar for å yte service til desse kundane. Etter kvart som trongen har minka, har opningstidene vorte kortare og kortare, heilt ned i eit par timar for veka enkelte plassar. Tanken har slått meg mange gongar at dette verken er god service eller rasjonell bankdrift. No har vi funne på noko som eg trur er smartare. Vi flyttar ut av det halvbrukte bankkontoret og inn i den lokale butikken. Eg må tilstå eg var litt redd for at enkelte ville sjå på dette som om banken flytta ut av bygda. Men heldigvis har eg blitt møtt med smil og nikk. Butikken er glad for ekstrainntekter, pensjonistane tykkjer det er fint å kunne ta ut pengar når det passar og eg som banksjef likar å spare kostnadar.

Det er litt rart å tenkje på at eg skriv om dette i ein blogg. Eg tenkjer også på at banken har fått 2500 vener på Facebook i det siste, at vi har 22 kontor i Sogn og Fjordane og Bergen, i tillegg til døgopen nettbank og kveldsope kundesenter. Å møte alle kundegruppene på deira premissar, og samtidig drive effektivt, er den store utfordringa til alle servicenæringane i dag. Derfor er eg takksam og glad for samarbeid på bygda, til beste for kundane, butikken og banken.