Hei, eg er Nina og eg kjem frå ein lita vakker bygd, Eikefjord. Her bur eg saman med mannen min Bjarte og våre tre barn. Vi bur på Hagen, ein gard på Storebru, der elva smyg seg mot Osen, og det store havet. Med ny driftsbygning og ammekubesetning vert det ikkje mykje tid til flugefiske, men det kjem nok tid for det og ein dag. I dag er eg i ferd med å avslutte eit viktig kapittel i mitt liv, og ta til på eit nytt.

Som marknadskonsulent i Sparebanken Sogn og Fjordane har eg hatt mange spanande år. I samarbeid med frivillige lag og organisasjonar, små og store festivalar, og prosjekt som banken har støtta med gåve og sponsormidlar. Det mest givande av alt, har vore å få delta i planlegging av banken sine kundearrangement. Det gjer nok noko med deg, dette å reise rundt om i fylket å arrangere seminar med fokus på å ha mot til å våge, tørre å gå mot straumen, tenke ut av boksen, og så vidare. Eg har vel lenge gått med ein etablerer i magen, og då vi i bygda såg ut til å misse blomsterbutikken gjennom 25 år, blei det sådd ein ide hos meg. Saman med nokre kreative venninner, fekk ideane spire og utvikle seg på våre faste trimturar til Hovlandsstøylen på seinvinteren. Det som starta som ein spøk, hadde brått tatt form og blitt konkretisert med forretningsplaner, produktkalkyler og budsjett.

At mine år i Sparebanken Sogn og Fjordane er medverkande til at eg torer å starte opp mi eiga bedrift saman med dei andre damene, er sikkert.  Gode leiarar som gjer deg tillit, og lærer deg å bevege deg ut av flytsona, er viktig, og noko som eg vil ta med meg inn i vår eiga verksemd. Å stå på ei scene og leie programmet for 400 personar hadde eg ikkje klart utan Arve Sandal sitt faste blikk og ”dette klarer du”. Men i eit miljø der det er klima for å oppmuntre og støtte kvarandre til utvikling, der kan ein overvinne seg sjølv. Om du ligg våken om natta, med uro for morgondagen, ja då LEVER du i det minste.  Eg har hatt nokre slike.

Vi er fire damer med ulike kvalitetar som no har starta In-spire, i Eikefjord.  Vi ynskjer at folk skal lage det koselig rundt seg, og glede andre. Vi vil inspirere andre til å ta vare på dei gode stundene. Anten du nyter ein blomsterbukett, eller eit godt heimebaka brød eller kaker. Vi vil selje interiørartiklar til å lage det triveleg i heim og hytte, og hobbyartiklar dersom ein vil kose seg med å skape noko eige.  Vi vil In-spire`re. Og ikkje minst – vi vil bidra til at den positive utviklinga av bygda vår held fram!

UngNo Seminar i Florø 17.februar

Det er ikkje fordi eg har ordet slik i mi makt, at eg har fått blogge på meirennbank. Det heng nok meir i hop med at eg er veldig gira på UngNo! Du lurer kanskje på kva det går ut på?   UngNo er eit slags ”Temposeminar” for ungdom ved den vidaregåande skulen. Vi prøver å trekke fram gode ting ved Florø, vise dei kva som er mogeleg,  inspirere dei, og ta ungdommen på alvor.

UngNo skal vere med på å skape relasjonar, kanskje lettar det  valet deira om nokre år, når dei skal søke jobb, og vi vil ha dei tilbake. Kvalitetane til Sogn og Fjordane er kanskje ikkje dei som er høgast rangert når ein er ung og det kriblar av eventyrlyst. Men har vi då ha sådd spira om ein bratt karrierestige, spanande jobbar og eit godt miljø, så er gjerne sjansen større for at dei vender nasa heimover.

Vi håper UngNo seminaret skal gjere inntrykk på ungdommane. At dei skal hugse dette som ein ”feit” dag, når dei sit i Oslo, Bergen, eller for den del på andre sida av jorda – med nasa langt nede i psykologi, fysikk eller marknadsanalyse.

Med  eit felles mål om å engasjere ungdommen, fekk vi med oss Næringsfond for ungdom i Flora og Ungt Entreprenørskap, i tillegg til støtte frå Sunnfjord2020 og Fylkeskommunen. Det viser at ved å samle kreftene kan vi utrette så mykje meir, og dette  gir meirsmak! Les meir om UngNo seminaret her.

Det er andre gong vi har eit slikt arrangement i Florø og Måløy hadde sitt første UngNo seminar i fjor. Vi håpar vi har sett nokre spor. Vi ynskjer å bli med på å løfte fram det positive. Med rett fordeling av innovasjon og tradisjon, skal vi bygge stoltheit. Så til alle dei som klagar i avisene, ikkje ”kødd” med bunaden min – den har mor mi brukt halve vinteren 1990 på å falde og brodere, og den ber eg rakrygga ved kvart ein høve!

Har du køyrt mot klarblå himmel i vest ein vintermorgon – på veg til ein jobb som gir deg utfordringar i mangfald, så har du nok, som eg, eit sterkt ønskje om å opne auga til alle som ikkje har sett denne fantastiske skatten. Sogn og Fjordane har mange av verdas beste arbeidsplassar, og eg jobbar på ein av dei!