I vårt kapitalistiske samfunn må sparebankdrift vere fantastisk! I staden for å sende overskotet via børsen til eigarar som kanskje er langt borte, gir vi av overskotet tilbake til lokalsamfunnet, til glede for alle kundane som har vore med å bygge opp banken. Sparebanken Sogn og Fjordane stiller opp med 8 millionar kroner i gåve til Hafstad Idrettspark, noko som kan bli avgjerande for at folkeparken til totalt 55 millionar kroner blir realisert.

Førde sin tur
I banken har vi kjent på at det var Førde sin tur til å få eit skikkeleg handslag frå den største banken i Sogn og Fjordane. Tidlegare har vi tatt store løft for utbygginga av Campus Fosshaugane, Idrettshall i Florø og Leikanger, skianlegg både i Sunnfjord og Nordfjord, kunstgrasbaner og ballbingar over heile fylket, redningsskøyte, opera på Nordfjordeid og idrettspark på Sandane. Banken har også brukt mange millionar på forsking i Vestlandsforsking, musikkbingar og talentstipend. Sidan banken har 20 prosent av låna og størst inntening i Førde er ei storsatsing her på sin plass. Endeleg har vi funne eit prosjekt som vil kome folk flest i Førde til gode og utvikle Førde som eit attraktivt bu og arbeidsområde.

Folkepark og plusshus
Det er  ikkje berre fotballen som skal boltre seg på nye baner. Her blir også ein park for rullebrett, joggeløype, rulleskianlegg, hoppbakke, basketballbane, skøytebane og amfi for konsertar. Sentralt i parken blir eit servicebygg som er tenkt som eit moderne plusshus. Det betyr at huset ved hjelp av varmepumper, solcellepanel og ekstra isolasjon skal produsere meir energi enn det brukar.

Dette passar godt med banken sitt sterke miljøengasjement. Eit slikt plusshus blir eit signalbygg og det første av sitt slag i fylket.

Ski og aller helst langrennsski er mi greie. Langrenn er svært god mosjon ettersom nærast heile kroppen må takast i bruk. Langrenn er snill og god aktivitet for kroppen, bortsett frå at det krevst bra kondisjon og blodpumpa får rikeleg å arbeide med i langrennssporet. Det er ein svært god følelse å lange ut bortover i terrenget, og samtidig vere i såpass bra form at neste bakke ikkje blir eit ork, men heller ei morosam utfordring.

Etter at perioden med oppfølging av ungar er over har eg valt å spisse aktiviteten ved å delta på Birken. Den fungerer som gulrota – ei utfordring som heng der framme, sjølv under dei mest regnfulle joggeturane om hausten. Eg har også hatt gleda av å aktivisere ungane innanfor denne sporten. Sjølv om konkurransefokuset no er over,  har aktiviteten festa seg ved at dei av eiga interesse held fram ski og friluftsliv i vaksen alder. For ein far med slik interesse er det kjekt å ta med seg.
 
Interessa og gleda med skisport har gjort til at eg har tatt på meg tillitsverv innan skiidretten. Det kjekkaste har vore deltakinga i dugnadsmiljøet som er knytt til Langeland Skisenter, og som organiserer tilbodet til dette skianlegget. Anlegget har blitt det mest besøkte av denne typen her i fylket. Etter studieopphald i Oslo på 70 og 80-talet med skiturar i Nordmarka erfaringsbakgrunn, såg eg at Langelandsområdet med “Hestane” som kulisse hadde kvalitetar som kunne utvikle området som Førde, Gaular og indre Sunnfjord sitt svar på Nordmarka. Det har vore interessant å vere med å utvikle dette potensialet. Attraktive bu- og arbeidsomåde treng gode rekreasjonstilbod. Langelandsområdet er ei mange brikker for å oppnå dette.
 
I vårt moderne samfunn krev dei fleste aktivitetstilbod meir eller mindre tilrettelegging. Tilrettelegging i form av barmarksopparbeiding av løyper og løypekøyring på Langeland har gitt eit tilbod som er blitt møtt med stor bruk og mange positive tilbakemeldingar. I jula og i starten av 2010 har tilstrøyminga til skianlegget vore enorm. For ein skientusiast er det veldig kjekt å registrere dette. Ta vinteren i bruk – i skisporet, og gjerne  på Langeland, blir vinteren fylt med positive opplevingar!

Kortreist mat er kjent for sine fordelar både i kvalitet og miljømessig samanheng. Her i banken tør vi påstå at også kortreiste banktenester byr på ei rekke fordelar. Du kan diskutere med folk som kjenner deg og bedrifta, du får raske avgjerder og som sparebankkunde ein ekstra bonus i form av gåver og sponsormidlar til idrett og kultur i kommunen din.

Det å bruke ein bank med hovudkontor i eige fylke gir dessutan større sysselsettingseffekt, og i neste omgang ein ekstra samfunnsverdi. Det er nemleg slik at eit lån avlar ei rekkje interne aktivitetar i banken som ikkje er så synleg for kunden. Når dette blir utført i lokalmiljøet gir dette større sysselsettingseffekt enn om det vart utført i ein by langt borte.  Dette gir grunnlag for interessante arbeidsplassar og kjøpekraft som kan vere med å bygge opp under anna lokalt næringsliv.

Betyr det noko for deg om kapitalen er ”kortreist”?