Søndag 25. juli er det duka for Eggenipa opp igjen. Som mange andre motbakkeløp har Eggenipa ei tiltrekningskraft av både unge og eldre som vil konkurrere med seg sjølve og andre. Viktigaste er kanskje likevel at ein må berre. Må berre ha den gode kjensla etter ein slitsam og flott opptur.

Sist søndag var eg på Eggenipa. Eg juksa litt. Eg køyrde opp i Øvredalen og gjekk der i frå. Likevel er dette ein flott og spesiell tur som eg gledar meg til kvart år. Eg har faktisk også mange gode barndomsminne frå Eggenipa. Det var det mest spennande fjellet i området heime. Ein smal spiss. Nesten rett opp. Kan vi gå der? Eg hugsar veldig godt gleda og spenninga då eg fekk vere med far min og brørne mine på Eggenipa for første gang.  Kvar gong vi kom køyrande frå Byrkjelo i retning Jølster, kunne eg endeleg skryte til venner og slekt om at eg hadde vore på den toppen. Rimeleg stolt var eg nok. 

Eggenipa Opp er som arrangøren seier, vilt, vakkert og rått. Er du ein av dei som ofte har tenkt på at den toppen skulle eg ha vore på, men endå har det til gode? Ja, då er det kanskje på tide å ”få ut fingeren” og gjere noko med det. Søndag kan vere den perfekte dagen.
Lukke til med arrangementet Breimsbygda!

Heimesida til Eggenipa Opp

ssf.no om Eggenipa Opp

Eg vart svært glad og stolt då eg før helga såg den siste bankkåringa til Norsk Familieøkonomi. Kvart år vurderer denne forbrukarorganisasjonen alle bankar i Norge når det gjeld vilkår på bustadlån, brukskonto, høgrentekonto og BSU. I skarp konkurranse med 125 bankar vart Sparebanken Sogn og Fjordane den 12.beste totalbanken i landet. Når det gjeld bustadlån på ein million kroner  er vi den 5. beste i kåringa. Alt i alt er vi den beste sparebanken på Vestlandet!

Herleg start
Ein herleg start på året. Dageleg prøver eg å vere oppatt av at vi i sparebanken må setje kunden i høgsetet og prøve å utvikle  tenester og vilkår som gjer banken konkurransedyktig og attraktiv. Men det å halde kundefokuset og vere utviklingsorientert er ikkje alltid like lett. Nytt regelverk, omfattande rapportering, krav til effektivitet, kvalitet og kunnskap er alle tema i det indre liv i banken som fort tek merksemda vekk frå kundane og det ytre liv. Rett balanse mellom det indre og ytre livet kan ofte vere kjempevanskeleg. Vi prøver å vere bevisste  på denne utfordringa og finne balansen så godt vi kan.

Kunden i høgsetet
Difor blir eg svært glad når eg ser at Sparebanken Sogn og Fjordane hevdar seg så godt i konkurransen. Når eg i tillegg veit at kundane gjev oss mange positive tilbakemeldingar i kundeundersøkingane, ja då tek eg det som eit prov på at vi i sparebanken i stor grad maktar å sette kunden i høgsetet og vere opptatt av det ytre livet. Gode kåringar og fornøgde kundar er også ei svært viktig vitamininnsprøyting for oss tilsette til å stå på for kundane og banken framover. Så ein betre start på året er vanskeleg for oss i Sparebanken Sogn og Fjordane å få.

Privilegert
Det skal sjølvsagt seiast at dei store forretningsbankane har markert seg i denne kåringa. Dei gjer heilt sikkert mykje bra og har nok ein del stordriftsfordelar. Men eg kjenner meg privilegert som får jobbe i ein sparebank, der føremålet er å arbeide for utbytte til lokalmiljøet og ikkje til velhaldne aksjonærar i Oslo, Stockholm eller København.

Landstoppen
Det er rett og slett kjempekjekt å få vere ein del av ein sparebank som ligg i toppen når det gjeld vilkår til kundar og som i tillegg brukar overskotet til å støtte over 900 frivillige lag, bygging av kunstgrasbaner og skianlegg, musikkbingar og talentfull ungdom i Sogn og Fjordane.

Folk i Sogn og Fjordane er smarte syns vi i sparebanken. Du og eg er smarte fordi vi er flinke til å betale for oss og til å spare pengar. Vi har med andre ord ein ryddig privatøkonomi og vi klarer å legge tilsides litt pengar. Dette likar vi i Sparebanken Sogn og Fjordane. Sjølvsagt er det kjekt for oss at kundane betalar låna sine og set pengar på sparekonto. Men det viktigaste av alt er ikkje nødvendigvis at dette er bra for banken, men at eg og du som bur her i fylket rett og slett får eit betre liv og har større fridom. Det å ha styringa over eigen økonomi eller å bli styrt av bankar, inkassobyråa og ande institusjonar er som natt og dag. Heldigvis har dei aller fleste av oss styringa sjølve.

Vi skal ikkje berre teikne eit glansbilde over dette. Gjennom livet opplever mange at den økonomiske kvardagen kan vere tøff. Spesielt når hendingar som det å stifte familie, det å bli arbeidsledig, oppleve samlivsbrot og oppleve at uforsett ting skjer. Det er knalltøft når den økonomiske tvangstrøya kjem på, men heldigvis ser vi at svært mange klarer til å finne tilbake til ein kvardag der draumane og fridommen pirrar oss igjen. Det er då vi kjenner at vi lever og har det best.

Min påstand om at folk i Sogn og Fjordane er smarte, er med utgangspunkt i dei erfaringane vi har som største bank i fylket. Vi har i mange tiår opplevd at kundane her i fylket er ryddige, men sjeldan har du og eg som privatpersonar spart så mykje pengar på bankkonto og i fond som no. Over 500 millionar har vi sett på konto og i fond det siste året. Samstundes er det svært få som har problem med å betale lånet sitt.  Berre 9 av 1000 lån blir ikkje betalt når det skal.

Dette er bra for banken, men det beste er fridomskjensla til kvar enkelt. Frie menneske har lagt basisgrunnlaget for eit godt liv.